أسير حياتي

ياليتني أقدر أسيّر حياتي
ولّا أحقق أمنياتي الوحيده

نفسي أعيش الموت مره وآتي
وأحي بموتي في وجوهٍ عديده

اجلس أشوف اللي خشع في صلاتي
واللي حضر واقف وروحه بعيده

واللي حلف يحمل بحبه رفاتي
واللي إكتغى ينظر وعينه شريده

واللي مشى خلفي يردد دعاتي
واللي ملا وقته بقصة جديده

واللي حضن نعشي وقبل عباتي
واللي رحل اول مودّع فقيده

واللي نزل قبري ودمعه يحاتي
واللي تأفف من ترابي بإيده

واللي عنا يحضر مجالس عزاتي
واللي نسى حتى يعزي بريده

واللي شهق باسمي وحزنه جهاتي
واللي شغل نفسه بورثٍ يريده

واللي ترك كونه وزاور مباتي
واللي مفكّر يفتكرني بعِيده

ياريتني أقدر احقق مناتي
وامسك بيدي كل أماني طريده


للشاعــر خالد بن علي ..